الليلة ماتمشي تنسى لَي الوصية زّي كل مرة وصية شِنو ان شاء الله؟ - خلاص داير تعمل رايح وما متذكر وطاشي شَبَكة كمان!- إحتمال أكون نسيت ، والواحد مرات بينسى وما بكون متذكر ومرات ما بكون مُجمِّع، كَدي ذكريني إنتِّ إنتَّ جادِّ في كلامك!! أيوا أنا جاد وجاد جدآ جدآ، بعدين تعالي هِنا ! أيه حكاية رايح وطاشي شبكة دي؟ إنتَّ الكلام دا بتجيبيهو من وين !!؟
إنتَّ ما عارف يعني ! أنا لو عارف ما كنتَّ سألتك خلاص ننسى الموضوع دا ودا وخلينا في المٌهم، وطبعا (إنتَّ المهم)، -عليك الله أدخلي لينا في موضوعك بدون (كِسير تًلٍج) ، - طيب يا سيدي إنت عارف أنو لو عامل فيها ما عارف! لازم،تعرف، الليلة اللَّمة عندنا لَمة شنو دي؟ - لمة الجيران والصاحبا ت ألفي القروبات لا حول ولا قوة إلا بالله ، الله لا بَارَّك فيك يا بتاع الفيس بوك والواتساب ، أها والمطلوب مني شنو ؟ - حاجات بسيطة كدا زي شنو يعني ؟ - عندك ورقة وقلم ؟ - عندي طيب خلاص أسمعني كويس وسجِّل وما تنسى حاجة عشان ما ترجع تاني طيب طيب، أمرنا لله، يَّلا قولي طبعا نحن عاملين غَّدا وتحلية وبس والباقي ونسة ساي- الغداء دايرين تعملوا فيه شنو؟ - جيب معاك كيلو ونص لحمة ضان ونص كيلو عجالي وكيلو مفروم وسجوك كيلو واحد، ونص كيلو جبنة وكيس مكرونة وصلصة كبيرة وباغة زيت كرستالة كبيرة ، بيتزا إيطالية، - إنت قاعد تكتب؟ أيوا قاعد أكتب أها وتاني دايرين اتنين كيلو موز ودستة برتقال ونص دستة قريب فروت وتجيب لينا عيش تركي وفطائر سورية وفلافل مصرية وبُلطي من سُندُس، - وتاني دايرين حاجة !!؟- كيف ما دايرين !! دايرين نحلّي ونهضِم بحاجات بسيطة ، كيلو باسطة وكيلو بسبوسة وبيبسي جامبو كرستالة واحدة بس- لا حول ولا قوة إلا بالله ، خلاص أقوم أمشي ؟ - تمشي وين؟- أمشي أقيف في الصراف الآلي قبيل نسيت أقول ليك تقولي لي شنو تاني كمان!! مفروض تجيب معاك قَش للمُكيف وتشتري كهرباء عشان باقي بس فيها مية وصاحباتي ديل بِحِبن الهوا البارد والتهوية وما بحملن السخانة زيي كدا، وأسمع هِنا سامعك: كان إنت منتكل تجيب قروش من الصرَّاف أخير لي أعمل رسالة جماعية لصاحباتي أقول ليهن تم تأجيل اللَّمة إلى أجل غير مُسمى عليك الله إنت ما بتخافي من الشحوم تعمل ليك مشاكل وما تقدري تتعالجي إلا يعملوا ليك شَفط أسبوعي وتنفس إصطناعي بعدين بي حالتك دي ، مافي نَقالة بتشيلك عليكم الله شوفوا جنس الراجل دا!! يعني عشان حِبِيبة الحاجات دي داير تعمل محاضرة في الرشاقة والدهون ونحن قررنا إننا أصلو ما نوقف لينا ركشة ولا نخلي لمتنا الفرايحية، بكرة بصحيك مع النباه الأوَّل عشان تمشي للصرّاف وتجيب لينا حاجاتنا قال رشاقة قال !!عاد يا رجال الزمن دا! لازم تفتشوا الأسباب عشان تجيبوا المرا التانية، شاحدة الله يتنّوا ليكم القيد في الشِكينيبة ، قُولن آمين يا نسوان
0121080508
0911013333
Abouellaf@hotmil.com
