أيقونة الوطن:فنانون تجمعهم مهنة التعليم

* عند تناول الفنان المعلم لمفردات من شاكلة سألت وين ، هل ، كيف نجد انها متداولة بكثرة في قاعات الدراسة وتخرج الكلمات بمعايير صادقة ومعبرة أكثر مما لو خرجت من غيره لأنها تكون معاشه وتلقائية وعفوية. 

الفنان محمد وردي : 

* عمل الموسيقار وردي معلماً بمدارس الشمالية قبل أن يأتي إلى الخرطوم والتي منها إنطلق وأصبح إمبراطور الفن السوداني وفنان أفريقيا الأول ومن أشهر أعماله:

كده أسال قلبك عن حالي أسأله 

ينبيك عن سؤالك وأشواقي أسأله 

* بفتش ليها في التاريخ وأسأل عنها الأجداد 

وأسأل عنها المستقبل اللسة سنينه بعاد

بفتش ليها في اللوحات محل الخاطر الماعاد 

وفي الأعياد وفي أحزان عيون الناس 

وفي الضل الوقف ما زاد

* كفى يا قلبي أنسى الفات وعيش من تاني وحداني 

لو حنيت لعهد الشوق أجيب من وين عمر تاني 

الفنان محمد ميرغني : 

* الأستاذ محمد ميرغني عمل بمهنة التدريس مثله كمثل الامبراطور وردي وعثمان مصطفى والطيب عبدالله وعبدالقادر سالم وصديق عباس وحسين شندي ومصطفى سيدأحمد وهلمجرا!

* كثيرون لا يعلمون شيئاً عن خلفيته في التدريس والتربية لذا جاء أداؤه راقياً مهذباً ومخارجه صحيحة واضحة ونطقه سليم كغيره من الفنانين المعلمين من أشهر أعماله  :

شفتك وابتهجت وين ياغالي إنت 

أنحنا الزمن شقانا وإنت زي ما إنت 

وكم رسالة ياحبيبي مني ليك بسطرها 

شوقي أغلب من غنايا 

ومع أشواقه : أنا والأشواق في بعدك بقينا أكتر من قرايب 

ما بنغيب عن بعض ابداً زي أعز اتنين حبايب 

الفنان عثمان مصطفى 

* الفنان عثمان مصطفى ايضا من المعلمين الأكفاء / ظهرت خصائص المهنة لديه في أدائه اللحني والأداء الغنائي لاسيما وهو أحد أساتذة الصوت في كلية الموسيقى والدراما هذا الإنتماء جعل له أثراً واضحاً في مسيرته الغنائية :

رحت في حالك نسيتني وإعتبرت الماضي فات 

لما انت خلاص جفيتني ليه بتحكي الذكريات 

لما تحكي ذكرياتنا كنت تحكيها بأمانة 

كيف بدت كيف إنتهت واتبددت قبال أوانة 

وكيف أمانينا الجميلة حلت الآهات مكانة 

طال علينا فراقكم والله ياغالين قدر ماننسى العلينا برضو مشتاقين ..

* الفنان الطيب عبدالله :

هو الرعيل الأول عمل مع زميله الموسيقار وردي بمعهد التربية  بشندي فأثرى الحياة التعليمية بعلمه كثرائه الفني السوداني الدارجي والفصيح يغلب على غنائه طابع الحزن والذي لاقى هوى في نفوس كثيرة جداً لدى معجبيه ومن جوانب في مسيرته الغنائية واللحنية والأدائية نقتطف بعض منها :

تذكر عهدنا الأول صحي الايام بتدول 

قريب يوم داك ماطول مضت ايام ياحليلة بقت أحلام وتتأول 

كم سهرت الليل شقاوة وسرت ليك مشوار يفتر 

والله مسكين المحبة تمشي للناس مابتقدر 

يافتاتي ماللهوى بلد اي قلب بالحب يبترد

 وسأكتم الجراح غايرات مالها عدد 

* الفنان مصطفى سيد احمد :

*المرحوم مصطفى عمل فترة بالتدريس بعد تخرجه في مدرسة بورتسودان الثانوية واتجه للفن وأبدع خصوصاً في الفن الرمزي وقد عاجلته المنية في ريعان شبابه وكان يرجى منه أكثر مما قدم :

والله نحن مع الطيور المابتعرف ليها مرسى

 ولافي ايدها جواز سفر 

غدار دموعك مابتفيد في زول حواسه اتحجرت 

جرب معاك كل السبل وايديه ليك ماقصرت 

حطمت في قلبه الأمل كل الأماني اتخدرت 

كلماته ليك ضاعت عبث لا قدمت لا أخرت

لا شك أن هناك مجموعة غير اللذين تطرقنا لها لهم جميعاً التحية وسنأتي بمشيئة الله لاحقاً لذكرهم..