منوعات: قرضمة وفنكهة

أما الآن، أو الجيل الحالي فهو يقول : فاكيها في روحو ، والمقصود هنا، شخص بعينه تتم الإشارة إليه بأنه من الذين يفاخرون ويفتخرون بأفعالهم وأقوالهم وسلوكهم وسط المجموعات أو الوَسط الذي يعيشون فيه لذا تجد الناس يوصفون هذا أو هؤلاء وأولائك بأنهم قوم منبوذون في محيطهم وهم لا يدرون أن الناس يتحسرون عليهم وعلى كل ما يصدر منهم وكأنهم خرجوا من المِلَّة التي لا تشبه السلوك القويم

في مجتمع النساء كذلك ، هناك أقوال منها على سبيل المثال لا الحصر (فلانة شايفة روحا ومتبوبرة علينا) أي انها تعتقد (مافي زولة بتشبها ولا واحدة عندها زي الحاجات العندها والراجل المتزوجاهو، ولا النعيم العايشة فيهو من غسالات ومكيفات وعربيات وخدامات وحمامات بالأحواض المستوردة، أها دي لما تتفاخر بقولوا عليها (متبوبرة وشايفة روحا وقايلة روحا صِغَيرة لي حَسَّا.

الفنكهة لدى الرجال مثل البوبار عند النساء والإختلاف نجده فقط في (نون النسوة) ، سَمع عيني الأيام دي، عادي جدا تلبس بنطلون يظهر كل مفاتن جسدها وأبوها يكون من الجماعة البقولوا ليك السترة واجبة والحِشمة ضرورية، البنطلون اللابساه البت لما تجي تطلعو من جسدها إلا تجيب تلاتة أو خمسة من بنات الجيران عشان يجرجروا البنطلون ، والعَجب لو كان -جينز- دا بخلي البت عاملة زي حبيبة ديجانقو في أفلام الكاو بويات وعلى أقل تقدير تكون زي هيفاء وهبي في الأفلام الما مرت بالرقابة والنقابة ، غايتو سمعت بي عيني الكتير ، ناس المنقة بالشطة زعلانيين زعل شديد من توقف الدراسة في المعاهد والجامعات لأنو الجامعات لو كانت فاتحة كان الأمور بتكون ظابطة معاهم

سمعت بي عيني إنو الكلام إتغير والسلام بقى : الأمور!، الحَنك!! ،دقيت ليهو جَرس، والأيام دي والله فلسطين للنهاية!، وما بلقى لي معاك ترتارة أو زرارة نعدل بيها راسنا ؟،ونشوف مقاسنا !، القندول -صينية-  والقندول ممكن يوديك في ستين داهية لو طلعت وَهمة ومسكوك الجماعة !

سمع عيني مُساعِد اللوري ممكن يموت من البرد في الشتاء إذا كان ما عنده بطانية وشال وملاية والسواق يكون ما جايب خبر مع سخانة المكنة والركَّاب يشخروا ساااي متلفلفين من البرد، وفي أول راكوبة في الخلا، السَّواق ،يقرص الفرامل ويقول للمساعد كدي شوف لينا لو الناس ديل عندهم شية للعَشا ؟ المُساعد ينزل بالجلالة ، على كل حال ، النار مولعة وشية الضان تخليك تقول : ياربي أنا في (قندهار) ولا في الخلا!؟ ،الشية رااقدة لكن بدون بَصَل، هو الأيام دي في زول بقدر على البصل !!؟ ،معقولة بس!!!؟، معقولة بس يا بصل تعمل في الناس كدا ؟، بعد كدا إلا نقوم نَغيِّير كلمات الأغنية ونقول : زرعوك وييين شتلوك وين يا البصل !!؟ ،في الولاية الشمالية ؟ أبداً لا وطبعاً لا، في كوريا الجنوبية ؟، أبدا لا وطبعا لا ، على كل حال ممكن نقول : بَصَلنا ولا عِنب الشام

سمع عيني السنة دي في رمضان الناس ما حا تقيف صفوف للتلج  لأنو الجماعة البكسِّروا التلج، ما حا يخلوا للوح واحد عشان الناس تقيف ليهو صفوف متراصة إضافة لذلك الدُنيا بَرِد الأيام دي!.

سمع عيني فيييي بلدنا دي ، في مستشفى لو مشيت قابلت الدكتور وقلت ليهو عندي وجع في ضُفري، طواالي يقول ليك أمشي أعمل رنين مغنطيسي واشعة وصور مقطعية، ويا تدفع يا كمان الموت جايز !، وفي البيت لما ترجع بي ركشة يعملوا ليك دلك قريب من موضع الوجع وبس الموضوع ينتهي لا قِرش ولا تعريفة إلا حق الركشة القال داير تلتمية عشان سِلك الكّلَش غالي وربع كيلو الزيت طار السماء مع الدولار والإسترليني والريال والبلد بقى فيها مليون ركشة ، تابعات لي منو ؟ السؤال دا .. أعفوني مِنّو وخلونا نَتٍم توريدتنا عشان الجلابي ما يقوم يطردنا بعد شهاداتنا الجامعية

abouellaf@hotmil.com

0121080508

0911013333